Gen 34 | ATA | STEP | No voxo vile la eiae Tina e, Iakovo ilee semau Lea 'ili'a, milai mixixaoxao sou mimaisi'a ta sema no tuala tila ne Sikemu.

Genesis 34

Sikemu Mu'oxonu 'Ilixo Masua Mulai Noxie Tina

1 No voxo vile la eiae Tina e, Iakovo ilee semau Lea 'ili'a, milai mixixaoxao sou mimaisi'a ta sema no tuala tila ne Sikemu. 2 Amolu anu itema vile tila no anu mata Ivi, anu tatananu tani no xalee lia ne Kanani ne, 'olu mulu ualasou lexe Sikemu. Mumaisie Tina la mulapune sou mulai noxie. 3 Mulai noxie mukalu la mu'unanu tanu noxie mo sou lexe ane imasaxau. 4 Xe ili'i la sou mulai muvikalanu momu lexe, “Mamilo, eni emasaxa lexe nano'e sema 'o ine'e mo a'uluxe!” 5 Xe Iakovo mulomu lexe 'olu Tina ane Sikemu mu'oxonu 'ilixo masua noxie ne, la uvikala vile uasi xo ta 'olu ta mulu ane mikei milai sou milailixa'a ta sipsip sou iiene'i xe i'ani ia'eia'e. Muxoomaie'i mo lexe ixali la sou uvikalane'i. 6 Amolu, Sikemu momu muavuti la mulutu mulai noxou Iakovo sou ilou mivivikalasou masaxa noxou 'olu. 7 No voxo ane Amolu mune'e sou ilou Iakovo mivivikala ne, la anu Iakovo ta 'olu milivu mixali. Mixali xe milomusou a'alosie vimo'a Tina lexe Sikemu mulapune sou mulai noxie, la mitamasie xe la'iaxa'a misevile, xo 'ilixo masua ane Sikemu mu'oxonu noxie Tina ne, anu masua misevile no ie'i ane'i ta Isilaeli. Itema vile ulai noxie sema aloxo ne, ane'i imama'u no anu misevile xo anu susu taxoxa'a ane.

8 Xe Amolu muavuti la muvikalane'i Iakovo ilo'a ta 'olu aloxo 'o, “Eni 'alixeni Sikemu ne, tanu mutulu pekia'u noxie Tina ne misevile, la sou ane eni atali'isinge lexe ngamasaxa la iengi uvaxaieisi mo u'uluxe. 9 Anu laixe lexe nenge nenge'a tataula'inenge nenge'a ngato'o mo sou xoluxolunenge nenge'a laixesi. Ta 'ilinge ta sema ine'e i'ulunexe, xe nexi ta 'ilixe ta sema ilai i'ulungenge. 10 Ngemasaxa lexe ngaxoo no lia xalee anevaa ne la mii noxingesi. Ngamasaxa lexe nga'oxomengi vote'i se'i sou mimii se'i uxali no anu, sou usu'ulingengi no anu xoluxolungenge mo ngingi mengesi ngasaxila'u, la anu mii vile uasi.” 11 Xe Sikemu muavuti la muvikalane'i Tina mamie ilo'a ta 'olu aloxo 'o, “Lexe ngingi opongengi u'osasou masaxa noxilo sie Tina, la mii ma'ia ane ngingi ngamasaxau ne, eni alosingesi. 12 Ia ngasosovosou 'ulusie mo ngavikalaleli lamana no anu mimii lailaixe ane ngemasaxau lexe eni alosinge. Mimii ma'i ane ngemasaxau ne, eni alosingesi, ia lexe ngano'e Tina ne ine'e mo a'uluxe.”

13 Ioxe, tava'u xo Sikemu mu'oxonu 'ilixo masua noxie Tina sou mulapune sou mulai noxie, la ta vimovimoe mixalixu xavutala vile sou ikalavoine'i Sikemu ilou momu Amolu. 14 Ta motu miavuti la mivikalane'i Sikemu ilou momu aloxo 'o, “Nexi umomomo sou ta'italone vivixe sou i'uluxu itema vile ane xooxoo ungaasou uao uasi. Xo maasi xe nexi ta'oxo aloxo ne la, anu mii sou maela toxoxa'a noxixe. 15 La sou lexe ngingi nga'oxo mii toxoxa'a 'o tei, ta mulu sou tualasinge ne lexe xooxoo ungasi'a ukalusi aloxo nexi 'o. 16 Lexe ngingi nga'oxo aloxo nexi telemolu ne, la sou nexi iexi uvaxainge sou nga'uluxa'a ta 'ili'ilixe ta sema xe nexi ta'uluxa'a noxinge. La sou nenge nenge'a taxolu tapita sou taxali loxo ta mitema sou tuala vilesisi. 17 Ia lexe ngingi ngamulinu masaxa noxixe aloxo telemolu lamana 'o uasi, la nexi tano'e vivixe sema 'o mo noxi'a talivu.”

18 Xe Amolu ilou 'olu Sikemu milomusou vaikalai'a Iakovo ta 'olu ne la tu'umaxu xe mutama laixe misevile no sangali'a ilou, la mimasaxa lexe ilai i'oxo aloxo milomusou noxi'a Iakovo ta 'olu ne. 19 Sikemu ne anu maulu vile e ta maulu ilavusou imasaxau mo itoxonu misevile. Anu momu ta minuminu. Anu mulomusou vaikala ane ne, la umasaxa lexe uvoovoxo la uasi, xo anu tanu u'elaie Tina lexe u'uluxesi. 20 Xe ilou momu milomu aloxo ne, xe miavuti la ilou milai no tilovolovo 'alai no aitengaxu vimelu sou tualasi'a tila ne sou mivikalane'i ta mulu sou tuala ne. 21 Vaikala e mivikalane'ixu aloxo 'o, “Ta mitema e nexi telai sou noxi'a tevivikala ne, ta laixe misevile. Mo mimasaxa lexe ine'e nenge'a taxolu tapita. Nenge lia nenge toxoxa'a misevile. Lexe nenge tamasaxai'a, la ane'i ine'e mo nenge'a taxolu tapita ano 'o, mo mii ma'ia ane ane'i imasaxa lexe i'oxonu ne, ane'i i'oxonusi, xo nenge lianenge toxoxa'a misevile. Lexe ane'i ine'e nenge'a taxolu tapita maninasou ane lai 'o, la sou nenge ta'uluxa'a ta 'ili'a ta sema xe ane'i i'uluxa'a ta noxinge. 22 Ia masaxa noxi'a vilesisi e ane'i mitulu pekia'u no anu ane lexe, ta mulu sou tuala tila noxinge 'o lexe xooxoo ungaasi'a ukalusi aloxo ane'i. Lexe nenge ta'oxo aloxo ane'i milemolu ne, la sou ane'i opone'i u'osa sou nenge'a taxolu, 23 la sou male ta sipsipi'a ilo'a ta kau mo mi'ami'a tavu'alo ne nenge miimenge kalumo. Ia tamulinu masaxa noxi'asi mo sou ine'e nenge'a taxolu.” 24 Ta mulu tavu'alo mukalusi e milai mipita no aitengaxu vimelu sou tuala pa'umolu ne, milomu noxi'a Amolu ilou 'olu Sikemu aloxo ne, la ane'i latala ne, mimasaxa lexe i'oxo aloxo ane'i ilou milemolu noxi'a ne. Mole ta mulu sou tuala tila ne xooxoo mungaasi'a mukalusi, ia vile pa'usou uasi.

25 Ta motu ixoxolixu xalexalevine'i voxo vile, mo tamei sou mo tatalu, mo navunavuxa'a 'ole ukalu uao, ia Iakovo ta 'olu tamei e, eiae Simeoni ilou Levi, Tina ta vimovimoe, ilou mino'u viso ka mitoke mimuamua'i miali no nano no tuala tila ne Sikemu ne, sou mixali'a. Ilou mive'ave'a ta mulu e ixoxolixu xooxoo anaxu tanixu ne mukalusi. 26 Miavuti vaxa la mive'a Amolu ilou 'olu Sikemu ne kalumo. Xe mitokine vimo'a Tina e ixoxoo no tani noxou Sikemu ne sou ilo'a milai. 27 Simeoni ilou Levi mive'a ta mulu sou tuala ne Sikemu ne mukalu, xe ta vimovimo'a ane ilo'a mami'a mixolu 'ole, milutu sou milai mi'unalai no tuala tila ne sou mipakali mimii. Mimii piena lailaixe ne, mitavule mulai mukalusi. Ane'i mi'oxo loxo ne sou lexe ikolinu 'ilixo masua e Sikemu mu'oxo noxie vimo'a Tina. 28 Xe miavuti vaxa la mino'a ta sipsip ilo'a ta kau mo ta donkii'a ne mukalusi. Mimii iouiou no nano mo no ale no tuala ne mino'u mukalusi. 29 Mimii iouiou e 'ulusou toxotoxoxa'a ne mino'u mukalusi. Ta sema sou tuala tila ilo'a ta 'ili'ili'a ne mino'a mukalusi kalumo. Mo mi'ami'a no taataasi'a ne mitaxusou mukalusi sou mitavule mulai. 30 Xe Iakovo muavuti la muvikalane'i Simeoni ilou Levi aloxo 'o, “Ngingi ngongou nge'oxo 'ilixo ano 'o, la mulosilo tu'umaxu toxoxa'a misevile. Ta mitema latala e ixoxolu no lia xalee ano 'o, loxo ta Kanani mo ta Peresi. Maasi xe ipita sou imasaxa lexe ialivulaleli, la umomomo sou ikalusixe noxi'a ta 'alixenisi, xo nexi tapiena uasi.” 31 Xe ane'i ilou miavuti la mikolinu vaikalau mami'a aloxo 'o, “Xo ma'i, nexi noxou iexi uvaxaie vivixe loxo nesi, mole ane'i i'oxone loxo sema sou vote'i loxo ne mole loxovaa?”